من فضلك: اخرج من غرفة الاحزان!!

السلام عليكــم ورحمـة الله وبركاتــة ،،

بســم الله الـرحمــن الرحيــم

كل واحد مننا ربنا أعطاه بيت فى حياته يعيش فيه فى الدنيا دى والبيت مش الشىء المادى اللى كلناه عارفينه لأ ,البيت المرة دى بيت معنوى روحنا عايشة جواه

البيت ده بقى فيه غرف ممكن عند ناس 3 وممكن عند ناس تانين 4 وممكن ناس تالتين يحولوه لفيلا أو قصر والتوسع فيه مجانا على فكرة مش هيحتاج فلوس كل الحكاية ترتيب عقل وأفكار ورضا وراحة بال
وكل الغرف دى ممكن يبقى السمة المميزة ليها السعادة لو فكرنا صح وحسباناها صح !!

بس يفضل فى كل بيت من دول صغير كان او قصر غرفة مظلمة محزنة كئيبة ,وللاسف الشديد ناس كتير بيفضلوا يعيشوا فيها ويقبلوا على نفسهم السجن والاعتقال جوه الغرفة دى طول حياتهم ,,حتى اذا حبوا يخرجوا شوية ويشموا هوا ويشوفوا بهجة الحياة تلاقيهم يرجعولها طوالى وكانها المبيت والسكن بتاعهم !!

بس ليـــــــــــــــــــه ده كله ؟؟هل الدنيا تساوى هم او غم ساعة ؟؟!! أبدا والله لا تساوى غم ساعة

حصلك ايه يعنى والدك اتوفى صح؟؟اأو والدتك ؟؟وفقدتهم وعايش على ذكراهم الاليمة!!
ربنا ابتلى حد من أهلك بالمرض او ابتلاك انت شخصيا !!
حاسس انك مظلوم فى الدنيا دى ومش واخد حقك وناس كتير جم عليك؟؟
حاسس ان حلمك ضاع وانك فشلت فى حياتك؟؟
بتحب واحدة وسابتك او بتحبى واحد وضحك عليكى؟؟
حاسس انك دخلت كلية الطب وعمرك ضاع؟؟
شايف الدنيا سودة قدامك لدرجة انك قرفت وتعبت من التفكير فى المستقبل؟؟
ولو مفيش حاجة من كل اللى فات وكئيب بدون سبب ؟؟طب ليه بتحب الاحساس ده مثلا وتستمتع بيه؟؟

............................

الى كل من فقد الاب أو الام ,هل تخجل من ان تشعر انك سعيدا أمام نفسك او تعيش على ذكريات أليمة وتخشى تقلبات الحياة بدونهما !!
هل حالك وانت حزين يرضى روح أمك او أبيك ام يزيدها ألما والله لا يفرحمها الا فرحك حتى وان ماتوا ولا يطمئنون عليك الا وانت مسرورا
وعلام كل هذا ولك الله سبحانه وتعالى ووهو أحن عليك من أمك التى ولدتك وأبيك الذى رباك

فعلى ماذا تحزن ومما تخاف ومعك رب العباد وخالق الخلق !

الى كل من ابتلاه الله بالمرض :
ألا تعلم أن الله اذا أحب عبدا ابتلاه
ألا تعلم ان فى ابتلاء الله تكفير للذنوب!!
ألا تعلم ان جسدك أمانة لديك وكلك ملك لله!
وان كنت مرضت بأى مرض كان فتمسك بالحياة واشكر الله واصبر على بلاءك حتى يرفعه الله عنك ويجزيك الخير كل الخير على ما صبرت ,,لان الجزاء عظيم ألاانها جنة الرحمن فيها ما لا عين رأت ولا أذن سمعت ولا خطر على قلب بشر

الى كل مظلوم :
الا يرضيك ان يناديك الله فى أعلى عليين ويقول لك ياعبدى المظلوم تقدم وياأيها الظالم لا تتكلم !!
ألأ يكفيك ان أعطاك الله دعوة لا ترد ليس بينها وبين السماء حجاب وان تكرمت وعفوت فان الله أكرم الاكرمين وسيجازيك عن عفوك ويدخر لك الاجر والثواب فى يوم يقول كل العباد نفسى نفسى وكل يبحث عن الحسنات وتجد مظلمتك ترد اليك بعفو ورحمة من الله
الدنيا مهما طالت فلن تدوم والظلم ان طال لا بد له من زوال
فثق فى الله واحتسب

الى كل من يأس من حياته وظن انه أساء الاختيار :
أعلم ان دخولك كلية الطب او اى كلية كانت ليس هو اختيارك انما هو اختيار الله والله يفعل ما يشاء ويختار !
كل ميسر لما خلق له والله أعطاك نعمة وفضل من عنده كى تشكره لا ان تكفر النعمة وتقول ياليتنى فعلت كذا او كذا ولم أدخل هذه الكلية !
الموضوع تعبك من ناحية ايه الفلوس يعنى وكده ؟؟مش هكدب واعمل افلاطونى وأقولك ان الفلوس بتروح وتيجى والمهم الصحة ولو ان الكلام ده حقيقى ومقتنع بيه بس هقولك تذكر حديث الرسول صلى الله عليه وسلم من أصبح معافى في بدنه آمنا في سربه عنده قوت يومه فكأنما حيزت له الدنيا
وانظر الى حياة رسولنا الحبيب والخلفاء الراشدين من بعده والصحابة والتابعين كيف كانت حياتهم؟
انظر الى الفاروق عمر وانظر الى عمر بن عبد العزيز من ملكوا الارض وظلوا فيها زاهدين لان غايتهم الله ورضاه
وكما قال الرسول صلى الله عليه وسلم :
من كانت الآخرة همه جعل الله غناه في قلبه وجمع له شمله
وأتته الدنيا وهي راغمة ومن كانت الدنيا همه جعل الله فقره بين عينيه وفرق عليه شمله
ولم يأته من الدنيا إلا ما قدر له .

دع المقادير تجري في أعنتها
ولا تبيتن إلا خالي البال
ما بين غفوة عين وانتباهتها
يغير الله من حال إلى حال

بتحب واحدة وسابتك او بتحبى واحد وسابك ؟؟
عارف انك عشت مشاعر حلوة وليك ذكريات جميلة مجرد انك تفتكرها بتخليك تزعل وتحزن !!
بس هل دى نصيبك وهل الدنيا هتقف عند واحدة او واحد,عارف ان الكلام بيبقى سهل ومرسل عن الاحساس والتجربة بس برده احنا عقولنا ان شاء الله هى اللى هتعمل الفرق وهترضى بقسمة ربنا وهترضى بالمكتوب مهما كان ونبقى عندنا حسن ظن بالله ان الاحسن لسه مجاش وقته وان ربنا أكيد مقدرلى الخير لان ربنا بيحبنى ولازم أجتهد وأحسن من نفسى وأطيعه عشان استاهل الحب ده ويعوضنى بالخير

الدنيا مسوده فى وشك وقرفان ومهموم بالتفكير فى المستقبل وعنائه ..,,طب وبعدين احساسك ده بيحل الامور وبيفتح الدنيا ويخليها تزهزه فى وشك لو كده قولنا !! بس معتقدش لان ده احساس هدام ومدمر وبيبقى الانسان مش ناقصه غير قبر يدفن نفسه فيه ..,,بس ده يرضى ربنا انك تعيش تعيش وحامل هم حاجة ومتوقع حاجات وحشة لسه وقتها مجاش
احسن الظن بحسن العمل يعنى خلى أملك بربنا كبير واشتغل وحاول مرة واتنين وألف وان الله لا يضيع أجر من أحسن عملا وافتكر دايما ان رزقك محدش هياخده غيرك وان محدش بيموت وله على وجه الارض نفس يتنفسه او شربة ماء يشربها الا وبياخدهم يعنى كفاية عليك كده وارحم نفسك من عناء التفكير فى حاجات مش فى ايدك انت وفى كل الحالات الزم الرضا لانه جنة الدنيا وباب الله الاعظم
ولو حصلك اى حاجة مهما كانت الجأ لربنا واشكيله وهو وحده اللى هيقدر يزيل عنك الهموم لانه على كل شىء قدير وهو القائل واذا سألك عبادى عنى فانى قريب أجيب دعوة الداعى اذا دعان
وتذكر قول رسول الله صلى الله عليه وسلم :
" ارض بما قسم الله لك تكن أغنى الناس

واخيرا من فضلك دع هذه الغرفة فورا وتنقل بين غرفات الامل والرضا وراحة البال والسعادة والطاعة فكلها مفتوحة أمامك وما عليك الا ان تختار !!

تقبلوا خالص محبتى
أخوكم فى الله

بجد دعوة جميله اوي للتفاؤل

بجد فعلا الدنيا مش مستهله

الواحد مش ضامن عمره

طول عمرك حكيم اخ هيثم
مرسى على مرورك الجميل